«ЖООДАРБЕШИМ»
«ЖООДАРБЕШИМ» – кыргыз элинин баатырдык дастаны. «Жоодарбешим» эл арасында мурдатан белгилүү болсо да, кийин (1940-жылы К. Суранчиевден, 1963-жылы О. Урмамбетовдон, 1968-жылы Майрыковдон) үч варианты жазылып алынган. Азыркы күндө КР УИАнын кол жазмалар фондусунда Орузбай Урмамбетов менен Суранчиев Калчанын варианты гана сакталып турат. «Жоодарбешим» 1971-жылы Кыргызстандан, 1988-жылы Үрүмчүдөн араб ариби менен басылып чыккан. «Эр Төштүк» эпосунун түздөн-түз уландысы катары белгилүү. Поэманын баш каарманы Жоодарбешим – Төштүктүн уулу. Дастанда Эр Төштүктүн ишке ашпай калган максаты – кара күчтүн символу болгон Чоюн алптын кекчил баласы Темир алптын өлтүрүлүшү баяндалат. «Эр Төштүк» эпосундагыдай эле мында да Темир алптын жаны Алтын баштуу ак аркардын ичиндеги жумурткадай сандыкка салынган алты кучкачта болот. Аны алуу үчүн Жоодарбешимдин жортуулу башталып, окуялар чиеленет. Поэма жеңиш менен аяктап, Жоодарбешим элине кайтып келип, кайрымдуу хан болот.
Ад.: Суванбеков Ж. Кыргыз элинин баатырдык эпостору. Ф., 1963; Кыргыз элинин оозеки чыгармачылыгынын тарыхынын очерки. Ф., 1973; Кыргыз адабиятынын тарыхы. III т. Ф., 2004.