БАЙЫРКЫ ГРЕК ИДИШТЕРИ
БАЙЫРКЫ ГРЕК ИДИШТЕРИ - антика жасалга-колдонмо көркөм өнөрүнүн мыкты үлгүлөрү. Негизинен турмуш-тиричиликке ылайык керамикадан же металлдан жасалган (коло, күмүш, алтын) жана мармар (лекиф) Байыркы грек идиштери пластикалык формалары
жана сыпайы, кооз жасалгасы менен айырмаланат. Көркөм кооздолуп, сүрөт тартылган карапа (керамика) идиштери кеңири тараган. Алгач Байыркы грек идиштери колго, кийин карапа калыпка салынып жасалган, кээ бирлери штампталып, рельефтик жасалгасы болгон. Алар формасы жана спецификалык функциялары боюнча салттуу түрдө 4кө бөлүнөт: 1) шарап сактоочу, муздатуучу идиштер (амфора, кратер, пелика, псиктер, стамнос); 2) сузуп алуучу жана куюучу идиштер (гидрия, киаф, ойнохоя); 3) бир нерсе ичүү үчүн (канфар, килик, ритон, скифос) жана өзгөчө топтогу идиштер; 4) ар кандай максаттарда - культтук, парфюмериялык (альбастр, арибалл, аскос, лебес, лекиф, лутрофор, пиксида) идиштер. Байыркы грек идиштери көбүнчө кооздолуп жасалган жана рельефтик жасалга көбүнчө идиштин тулкусунун жогорку бөлүгү менен ийин тарабында болот. Ал эми тулкусу жапыз вазаларда жана өйдөнү көздөй кеңейип кеткен киликтерде жасалга түбүндө же капталдарында жайгашкан. Ваза жасоонун эң алгачкы этаптарында идиштин жогорку жагы кооздоп жазылган.