БАКИНОВА

БАКИНОВА Гүлжамал (12. 03. 1917, Нарын облусу, Жумгал району, Чаек айылы – 21. 06. 2001, Бишкек) –тилчи, алгачкы диалектолог, филология илимдеринин кандидаты (1954). Мугалимдик кыз­матта жүрүп, Фрунзедеги жумушчу факультетин (РАБФАК), кийин педагогикалык окуу жайын (1939), Кыргыз мамлекеттик педагогикалык институтун бүтүргөн (1942–1944). Пржеваль­скидеги Киров атындагы орто мектепте мугалим (1941–1942), СССР ИАнын Кыргызстандагы филиалынын (КирФАН) тил, адабият жана тарых институтунда улук илимий кызматкер (1949), 1956-жылдан сектор башчы. Өзбекстан, Казакстан, Тажикстанда жашаган кыргыздардын тилинин жергиликтүү өзгө­чөлүктөрүн изилдеп, бай материал топтогон. 2- класс үчүн окуу китеби (авторлош), «Эне тили» окуу китеби жарык көргөн (1950). Белгилүү эм­гектери: «Кыргыз тилинин Октябрь районунун говору» (1952), «Ысык-Көл говорлорунун матери­алдарынан» (1955), «Кыргыз тилинин Ош говору» (1956), «Кыргыз тилинин Жалал-Абад обла­стынын говорлору» (1958), «Кыргыз тилинин Чүй говору» (1959), «Өзбекстандагы кыргыздардын ти­линдеги жергиликтүү өзгөчөлүктөр» (1962), «Диа­лектологиялык материалдарды жыйноо боюнча справочник» (1963). Бакинова «Кыргыз тилинин диа­лектологиялык атласын» түзгөн.