БАНДУНГ

БАНДУ́НГ – Индонезиядагы шаар. Ява аралында жайгашкан. Батыш Ява провинциясынын административдик борбору. Калкы 3,0 млн (2019, агломерациясында 5,5 млн). Калкынын саны боюнча өлкөдөгү 4-шаар. Ява аралынын батышында деӊиз деӊгээлинен 700 м бийиктикте жайгашкан тоо курорту. Жакарта шаарынан 100 км түштүк-чыгышта. Жолдор тоому. Эл аралык аэропорту бар. Текстиль, хинин чыгаруучу, электр-техникалык, резина-техникалык, консерва, металл иштетүү жанаа машина куруу ишканалары, авиация заводдору иштейт. Пастер, техникалык институттары, менчик ЖОЖдор (ислам жана католик ж. б. университеттери), сүрөт өнөр жана геология музейлери, Лембанг (Босха) обсерваториясы, илим-изилдөө институттары (анын ичинде ядро энергетика борбору) бар. Өлкөнүн ири соода жана өнөр жай борбору. Туризм өнүккөн. 1955-жылы Бандунгда Азия жана Африка өлкөлөрүнүн конференциясы өтүп, тынчтыкта жанаша жашоонун беш принциби кабыл алынган. 1810-жылы негизделген.