БАНКРОТТУК

Кыргызстан Энциклопедия жана Терминология Борбору дан
Навигацияга өтүү Издөөгө өтүү

БАНКРОТТУК (итал. banco – банк‚ rotto – сынган)‚ к у д у р е т с и з д и к – жөнөкөй түшүнүктө – компаниянын же фирманын‚ жарандын карыз милдеттенмелерин төлөөгө зарыл каражаттарынын жоктугунан улам төлөөдөн баш тартышы. Юридикалык көз караштан алганда сот же арбитраж тарабынан карыздакор төлөөгө таптакыр кудуретсиз жана ошого байланыштуу карызын жабуу максатында экономикалык ишмердик жүргүзүүгө жөндөмсүз деп табылгандыгы Банкроттук деп эсептелет. Банкроттук болгон учурда карыздакордун мүлкүн сатуу же ошол ишкананын кызматкерлери мүлктү сатып алып‚ карызды жабуу бул абалдан чыгуунун жалгыз жолу болуп саналат. Экинчи вариантта ишкананын мүлкү ошол коллективдин менчиги болуп калат. Банкроттук тууралуу иш козгоого негиз болуп төмөнкүлөр эсептелет: 1) карыздакор өзүн экономикалык жактан кудуретсиз‚ башкача айтканда банкрот деп таануусу; 2) карыздакордун экономикалык кудуретсиздигинин себептеринин жана натыйжасынын негизинде сот тарабынан Банкроттук тууралуу иш козголушу; 3) карыздакордун экономикалык кудуретсиздиги тууралуу соттун же арбитраждын чечиминен кийинки кредитордун арызы. Банкроттук тууралуу иш арыз же сот чечими түшкөн күндөн тартып козголду деп эсептелет. Cот чарбалык субъектти Банкроттук деп тапкандан кийин тиешелүү чечим чыгарат жана жоюу комиссиясын түзөт. Кыргызстанда 1997-жылдын 15-октябрында КРдин Жогорку Кеӊеши кабыл алган «Банкроттук (кудуретсиздик) жөнүндө» мыйзамдын негизинде иш жүргүзүлөт.