БАСКЕТБОЛ
БАСКЕТБО́Л (англ. basket – себет, тор ж-а bаll – топ) – командалык спорт оюну. Анын эрежесин Ж. Нейсмит (АКШ) иштеп чыккан. Баскетбол узундугу 26 м, туурасы 14 м болгон төрт бурчтуу аянтчанын эки жак четине орнотулган мамыга бекитилген тору бар калкандуу алкакка топту кол менен ыргытып-түшүрүп ойнолот. Жерден калкандын алдыӊкы чегине чейин бийиктиги 3,05 м. Оюнду ар биринде 5 оюнчусу бар 2 команда ойнойт. Оюн учурунда топту өнөгүнө берүүгө, жерге элеп жүрүүгө болот. Топту бут менен тебүүгө, муштум менен урууга, эки колдоп элөөгө, көтөрүп алып чуркоого болбойт. Эл аралык федерациясы 1932-ж. н е г и з д е л г е н . 1936-жылдан Олимпиялык
оюндардын, 1950-жылдан дүйнөлүк чемпионаттын программасына кирген. Кыргызстанда оюн 1924-жылдан тарала баштаган. Анын өнүгүшүнө Москва, Ленинград (азыркы Санкт-Петербург) шаарларынын адистери чоӊ салым кошкон. 1954-жылы бүткүл союздук аренага чыккан. 1971–85-жылдары Кыргызстан командасы СССРдин биринчилигине катышып, алдыӊкы орунду ээлеп келген. Баскетбол боюнча А. Антипина – дүйнөнүн (1964, 1967), Е. Баранова – Европанын (1968), В. Петраков Олимпиялык оюндардын чемпиондору болгон. Республикада балдардын 27 спорт мектебинде өздөштүрүлөт.