БАС БӨЛТӨК

БАС БӨЛТӨК, Б а й т и к т и н Б а с б ө л т ө г ү, Б о з б ө л т ө к – Кыргыз Ала-Тоосунун этегиндеги бөксө тоо. Ала-Арча суусунун тоодон чыга беришинде, Бишкек шаарынан 3–6 км түштүк-батышта жайгашкан. Абсолюттук бийиктиги 950–2100 м. Түндүк жагы жазы (5 км), түштүк бети кыска, бирок жантайыӊкы. Үстү жайык плато; түндүк тарабы тектоникалык жаракалар жана жарлар менен чектешет; чыгыш капталы тектирлүү. Тоонун үстүнкү кыртышы лёсстуу кумай топурак, асты неогендин чопо, шагыл-таштуу конгломераттарынан турат. Шыбак-эфемерлүү жарым чөл (түндүк), кылканактуу-түркүн чөптүү талаа, шалбаалуу-талаа өсүмдүктөрү, коктуларда бадалдар өсөт. Түндүк жана чыгыш капталдарына, тектирлерге бак-дарак (мисте, кара жыгач, өрүк ж. б.) отургузулган. Жайыт.