БАТИАЛЬ ЗОНАСЫ

БАТИА́ЛЬ ЗОНАСЫ , б а т и а л ь (гр. bathes – тереӊ) – деӊиз, океан түбүнүн материктик тайыздык менен океан таманынын аралыгын ээлеген зонасы; материктик капталдын тереӊдигине дал келет. Бул экологиялык зонага улам тереӊдөө, гидростатика басымынын жогорулашы (200–500дөн 3000 мге чейин), суусунун температурасынын акырындап төмөндөшү жана фотосинтездөөчү өсүмдүктөрдүн жоктугу, ошондой эле күн шооласынын өтө аз же жок болушу мүнөздүү. Түпкү тектер органогендик ылайдан (фораминифер скелеттик калдыктары, кокколитофорид ж. б.) турат. Суусунда автотрофтуу хемосинтездөөчү бактериялар кеӊири таралган; омуроо буттуулар, деӊиз чалгындары, ийне терилүүлөр, он буттуу рак сымалдуулар жана субагай куйрук балыктардын тукуму, көмүр балыктар байырлашат. Биомассасы негизинен айрым учурда ондогон г/м² менен берилет. Океан түптөрүндө батиаль чөкмөлөрү жатат.