БАШ-НУРА МӨӉГҮСҮ –

БАШ-НУРА МӨӉГҮСҮ – Чоӊ Алай кырка тоосунун эӊ чыгыш бөлүгүндөгү татаал-өрөөн тибиндеги мөӊгү. Чыгыш Кызыл-Суунун алабында жайгашкан. Узундугу 13,8 км, аянты 54,2 км², абляция облусунун аянты 20,3 км². Көлөмү 4,74 км³. Мөӊгүнүн башы деӊиз деӊгээлинен 6340 м, этеги 3690 м бийиктикте жатат. Кар чегинин бийиктиги 4300 м. Фирн облусу Чоӊ Алай кырка тоосунун Чыгыш Таӊы (6346 м) жана Эркеч-Там (5820 м) чокуларынын ортосундагы түндүк капталды ээлейт. Этегинин эни 3 км. Мөӊгүдөн агып чыккан суу этек моренанын топтолушуна шарт түзбөйт. Азыр мөӊгү чегинүүдө. Андан Чоӊ Кызыл-Суунун оӊ куймасы – Нура суусу башат алат.