БЕРИНГ
БЕ́РИНГ Витус Ионассен (Иван Иванович) (12.8.1681, Дания, Хорсенсе – 8.12.1741, азыркы Беринг аралы) – орус деңиз саякатчысы. Россия флотунун капитан-командору (1730). Даниялык. 1703-жылы Россия аскер-деңиз флотуна кызматка
чакырылган. 1724-жылга чейин Балтика ж-а Азов флотторунда кызмат өтөгөн. Пёрт Iнин буйругу м-н Орус флотунун 1-рангдагы капитаны кызматына (1724) алынган. 1725-жылы Азия ж-а Американын аралыгында мойнок же кысык бар экенин далилдөө үчүн уюшулган 1-Камчатка экспедициясынын башчылыгына дайындалган. Экспедиция Камчатканы ж-а Чукотканы жээктей сүзүп, кысыктан өтөт да (кийин ал Берингдин ысмы м-н аталган), бирок тумандан жер көрүнбөгөндүктөн, кысыктын бар же жок экенин аныктай алган эмес. Бул сапарында 67°18' түш. кеңдикке чейин жеткен. 1732-жылы 2-Камчатка экспедициясын башкарып, Түндүк Америкага жетип, бир нече аралды ж-а Алеут жалчасын ачкан. Изилдөөлөрү м-н чийген карталарынын негизинде 30дан ашык илимий эмгеги жарык көргөн. Кайтып келатып, кыштаган аралда (кийин анын ысмы м-н аталган) каза болгон. Берингдин аты м-н Тынч океандагы деңиз, Түштүк Аляскадагы мөңгү ж. б. аталган.
Ад.: Берг Л. С. Открытие Камчатки и экспедиции Беринга. 1725–1742. 3-е изд. М.; Л., 1946; Пасецкий В. М. Витус Беринг. М., 1982.