БЕШТАШ КӨЛҮ

БЕШ-ТАШ КӨЛҮ – Талас Ала-Тоосунун түндүк кап­талындагы Беш-Таш капчыгайында деңиз деңгээлинен 3008 м бийиктикте жайгашкан көл. Аянты 0,54 км², орточо тереңдиги 13 м, эң терең жери 28 м. Узундугу 1200 м, туурасы эң жазы жеринде 600– 700 м. Суунун көлөмү 6,6 млн м³. Жер көчкүдөн кийин өрөөндүн бөгөлүп калышынан пайда бол­гон. Суусу тунук, мөңгү ж-а булак сууларынан толукталат. Июнь–июлда деңгээли 1–2 мге че­йин көтөрүлүп, сентябрь–майда кайра бөксөрөт. Октябрда тоңуп, апрелде ачылат. Балык (жилингир, алабуга, севан жилингири) бар. Көлдөн Беш-Таш суусу агып чыгат. Көлдүн тегереги, ай­рыкча андан төмөнүрөөк, Беш-Таш суусунун сол жээгинде жайгашкан эки чакан көлдүн ланд­шафты өтө кооз. Рекреациялык мааниси зор.