БОЗБУ-ТОО

БОЗБУ-ТОО Чаткал кырка тоосу менен Нарын дарыясынын аралыгынан орун алган. Чыгыш жагындагы Ат-Ойнок тоосунан Кара-Суу суусу бөлүп турат; батыш жагы жапыздап, Пишкаран ойдуӊчасына өтөт. Узундугу 30 км, туурасы 14 км, эӊ бийик жери – Шилби чокусу (2876 м). Тоонун негизин палеозой заманынын порфит, туф жана кумдук, акиташ тоо тектери түзөт, капталдарында мезозой чөкмөлөрү жатат. Түштүк этектерин палеогендин кызыл чополуу тектеринен турган адырлар ээлейт. Жарым чөл, кургак жана шалбаалуу талаа ландшафттары мүнөздүү. Жайыттуу түштүк-батыш этегинде (Майлы-Сай) нефть кени бар.