БОНГО

БОНГО (Tragelaphus eurycerus) – көңдөй мүйүздүүлөр тукумундагы сүт эмүүчү. Токой антилопасы уруусунун эң ири өкүлү; дене узундугу 1,7–2,5 м, куйругунун узундугу 45–65 см; салмагы 210–405 кг. Денесинин жон жагы кочкул-күрөң, капталдарында ак чийиндери, буттарында жана төшүндө жарым ай сымал ак тактары бар; мүйүзү лира сымал, эркегинин мүйүзүнүн узундугу 1 мдей. Батыш жана Борбордук Африканын майда токойлорун мекендейт; кургак сезондо бийик тоолорго 3000 мге мейин көтөрүлөт, жаанчыл мезгилде өзөн жээгине түшөт. Бонго өтө сак, коркок, жашыруун тиричилик кылат. Таң эрте жана кечкурун оттойт; негизинен өсүмдүктүн жаш өркүндөрү, жалбырактары жана мөмөсү менен азыктанат. Эрекектери жалгыздан, 50дөй ургаачысы жаш музоолору менен үйүр түзөт. Ургаачысы жылына бирден музоо тууйт. ТКЭСтин Кызыл китебине катталган.