БУЛАВАЙО

БУЛАВА́ЙО – Зимбабвенин түштүк-батышындагы шаар. Түндүк Матабелеленд провинциясынын административдик борбору, ошону менен катар өз алдынча провинция статусуна ээ. Калкы 653,3 миӊ (2012); калкынын саны боюнча өлкөдөгү 2-шаар. Матабеле платосунда, деӊиз деӊгээлинен 1600 м бийиктикте жайгашкан. Жол тоому. Эл аралык аэропорту бар. 1884-жылы негизделген. Илим жана технникалык университет (1927), калк жана улуттук китепкана, музейлер, сүрөт галереясы, театр бар. Улуттук кол өнөрчүлүктүн борбору. Жыл сайын эл аралык соода ярмаркалары өткөрүлөт. Тамак-аш, текстиль, фармацевтика, булгаары-буткийим, химиялык, жыгаччылык, машина куруу, металл иштетүү өнөр жайлары иштейт. Тоо кен казып алуучу (хромит, асбест, алтын, калай, жез, никель) аймактын борбору. Шаарга жакын Матопос улуттук паркы (Сесил Родстун сөөгү коюлган) жайгашкан. Булавайодан 22 км аралыкта соӊку темир доорунун калдыгы Кхами тургун жайы сакталган. Ал Бүткүл дүйнөлүк мурастын тизмесине кирген.