БУРГУЛОО

БУРГУЛОО – забойдо тоо тектерди ирети менен оюу аркылуу цилиндр формасындагы көзөнөк, шпур жана тоо-кен казылмаларын өткөөлдөө процесси. Бургулоо эл чарбасында – а) инженердик-геологиялык жана мелиорация жумуштарында; б) кен байлыктарды чалгындоодо; в) тоо-кен ишинде шамалдатуу жана суу сордуруу максатында; г) шахта өткөөлүнүн татаал процесстерин механикалаштырууда; д) кен байлыктарды казып алуудагы жардыруу жумуштарында; е) нефть, газ алууда жана артезиан кудуктарынан суу чыгарууда кеӊири пайдаланылат. Бургулоонун төмөнкүдөй түрлөрү бар: 1) туташ забойлуу Бургулоо; 2) колонкалуу Бургулоо. 19-кылымда тоо-кен өнөр жайынын өнүгүшү жана калктын сууга болгон муктаждыгынын күчөшү Бургулоо техникасын өркүндөттү. 50-жылдары швейцариялык механик Г. А. Лешо алмаздык Бургулоону практикага киргизген. 1944-жылы Ф. А. Семёнов нефтини көзөнөктүн жардамы менен алууну сунуш кылган. Бургулоо өндүрүшүнүн башкы маселелери: көзөнөкчөлөрдү, шпурларды өтүүнү ылдамдатуу жана арзандатуу, ошондой эле долбоорлоо, конструкциялоо жана илмий-изилдөө иштерин, Бургулоо техникасын, технологиясын кайрадан иштеп чыгуу.

Ад.: Ханмурзин И. И. Бурение на верхнюю мантию. М., 1967; Техника горного дела и металлургии. М., 1968. Техника и технология высокоскоростного бурения. М., 1952.