БЫЧУУ

БЫЧУУ , б и т т ө ө – эркек малдын жыныс безин хирургиялык жол менен алып таштоо же ал бездин кызматын башка ыкмалар (гормон берүү, нурга кактоо) менен токтотуу. Ветеринардык практикада малды хирургиялык бычуу кеӊири колдонулат. Бычылган мал (бычмал) жоош болуп, жакшы бордолуп, эти даамдуу, жагымдуу келет. Кээде малдын жыныс мүчөсүнүн сезгениши ж. б. жараатты айыктыруу үчүн да жасалат. Мал көбүнчө эрте жазда же кеч күздө бычылат. Малды бычуу ишин ветеринардык адис жүргүзөт. Хирургиялык бычуу эки түрдө жүргүзүлөт: кан чыгаруу менен – калтаны кесип, эн алынып ташталат; кан чыгарбай – эн танабын кысуу же эзүү менен эндин иштеши токтотулат. Бычылган айгыр – ат, бука – өгүз, буура – атан, кочкор – ирик, теке – серке (эркеч) деп аталат. Жылкы 3–4 жашында (бышты кезинде), букачар 1 жашында, борго байлануучулары 6 айлыгында, козу-улак 4–6 айлыгында биттелет.