БӨТӨН СӨЗ

БӨТӨН СӨЗ – жазууда же оозеки сүйлөөдө айтылган башка бирөөнүн сөзү. Бөтөн сөз колдонулушуна карай тике сөз жана кыйыр сөз болуп бөлүнөт. Бөтөн сөз лексикалык курамы, грамматикалык түзүлүшү жагынан өзгөртүлбөй берилсе тике сөз деп аталып, тырмакчанын ичинде жазылат (мис., «Уят өлүмдөн катуу», – деди Султан). Ал эми Бөтөн сөз өзгөртүлүп жалпы мазмуну гана сакталса, кыйыр сөз деп аталып, тырмакчага алынбай жазылат (мис., Султан уяттын өлүмдөн катуу экендиги жөнүндө дагы кайталап айтты).