ВАГОВ

ВАГОВ Алексей Власович (18. 2. 1905, Россия империясы, Войска Дон облусу, Ростов-на-Дону шаары – 6. 5. 1971, Украина ССРи, Винница) – советтик партиялык ишмер. Кыргызстан КП БКнын 1-секретары (1938–45). 1955-жылы Москвадагы КПСС БКнын алдындагы Жогорку партиялык мектепти бүткөн. 1929-жылы Ростов шаарында «Ростсельмаш» заводунун комсомол комитетинин секретары, 1929–30-жылдары комсомолдун Миллеровск (Түндүк Кавказ крайы), 1930-жылы Камышинск (Төмөнкү Волга крайы) райкомдорунун секретары, 1931-жылы комсомолдун Саратов (Төмөнкү Волга крайы) райкомунун уюштуруу бөлүмүнүн башчысы, 1931–32-жылдары партиянын Сталин (Ростов-на-Дону шаары) райкомунун инструктору, 1932–33-жылдары Москвадагы Ильич атындагы заводдун партиялык комитетинин секретары, 1933-жылы Москва облусунун Луховицск районунун «Красная Пойма» совхозунда саясий бөлүмдүн начальниги, 1934–37-жылдары Москвадагы Сталин атындагы автомобиль заводунун (ЗИС) партиялык комитетинин секретары, 1937–38-жылдары СССР автомобиль өнөр жай кызматкерлер профсоюзунун төрагасы, 1946–50-ж. Украина КП Винница шааркомунун секретары, 1950–52-жылдары 1-секретары, 1955–61-жылдары Винница облустук аткомунун төрагасынын орун басары болуп иштеген. ВКП (б) Борбордук текшерүү комиссиясынын мүчөсү (1939–52). СССР Жогорку Советинин депутаты (1-чакырылышы). Ленин, эки Эмгек Кызыл Туу ордендери менен сыйланган.