ВЕКСЛЕР

ВЕ́КСЛЕР Владимир Иосифович [19. 2(4.3). 1907, Житомир – 22. 9. 1966, Москва] – орус физиги, СССР ИАнын академиги (1958; корреспендент мүчө, 1946). Москва энергетика институтун (1931) бүткөн. 1936-жылдан СССР ИАнын П. Н. Лебедев атындагы Физика институтунда ж-а 1949-жылдан Дубнадагы Ядролук изилдөөлөрдүн кошмо институтутунда да иштеген. 1963-жылдан СССР ИАнын Ядролук физика бөлүмүнүн академик-секретары. Венкслер – рентген нурларынын физикасы, космостук радиация ж-а ылдамдаткычтар боюнча ири адис. Анын жетекчилиги м-н Дубнада протондук синхротрон (1947) ж-а синхрофазотрон (1957) ишке киргизилген. Заряддуу бөлүкчөлөрдү ылдамдатуунун физикасы ж-а техникасы боюнча илимий мектепти негиздеген. Ал Ленин (1959) ж-а СССР мамл. сыйл. (1951) лауреаты. 1963-ж. эл аралык «Атом – тынчтыкка» сыйлыгына татыктуу болгон. Үч Ленин ордени, Эмгек Кызыл Туу ордени ж-а медалдар м-н сыйланган.