ВЕРТУНОВ

ВЕРТУ́НОВ Леонид Никифорович (8.15.1922, Россия, Киров облусу, Верхний кыштагы – 31.8.2003, Бишкек) – геолог, геология-минералогия илимдеринин доктору (1969), профессор (1970). 1949-жылы Орто Азия мамлекеттик университетин (САГУ) бүткөн. Кыргыз мамлекеттик университетинин география факультетинде ассистент, доцент, кафедра башчысы, ФПИде кафедра башчысы, илимий иштер боюнча проректор, 1993–2003-жылдары Кыргыз тоо кен-металлургия институтунда лаборатория башчысы болуп иштеген. Илимий иштеринин негизги багыты – нефть литологиясы. Геология боюнча жергиликтүү калктын инженер кадрларын даярдоого чоӊ салым кошкон. Ата Мекендик согуш ордени ж-а медалдар м-н сыйланган.