ВИЛЛЕМСТАД
ВИ́ЛЛЕМСТАД – Антил аралдарынын (Нидерланддык) административдик борбору. Калкы 98,3 миң (2006). Кюрасао аралынын түштүк-батыш жээгинде. Кариб деңизинин түштүгүндөгү ири порт; Скоттегат табигый жабык гаванында жайгашкан; деңиз м-н канал аркылуу (эки көпүрөсү бар) туташат. Океан кемелери да токтойт (Батыш жарым шардагы эң ири кургак док; нефть сактоочу жайы да бар). Эл аралык аэропорту бар. 1527-жылы испандар негиздеген, 1634-жылы нидерланддар басып алган. 17–18-кылымдарда Кариб деңизинин алабындагы кул соодалоонун башкы борборлорунун бири болгон. 18-кылымдагы черепица м-н жабылган голландиялык үйлөр фонтандары м-н, Амстердам форту (өкмөт резиденциясы; 1635), губернатор сарайы, ратуша, чиркөө (1769), кул соодалоочу эски базар, калкыма базар (тент м-н жабылган кайыктар), Батыш Жарым шардагы байыркы Микве синагогасы (1732) сакталган. Шаардын тарыхый бөлүгү Бүткүл дүйнөлүк мурастын тизмесине кирген. Университет (1732), музейлер (Кюрасао, нумизматика, почта, улуттук археология, антропология, деңиз ж. б.) бар. Виллемстад – офшор бизнесинин ж-а чет элдик туризмдин борбору. Нефть ажыратуучу завод (негизинен Венесуэладан алат) иштейт.