ВИНДХУК

ВИ́НДХУК – Намибиянын борбор шаары. Өл­көнүн борбордук бөлүгүндө, деңиз деңгээлинен 1650 м би­йиктикте жайгашкан. Калкы 277,3 миң (2006). Жолдор тоому. «Хосиа Кутако» эл аралык аэро­порту бар. Шаар 1890-жылы негизделген. Кафедра­луу собор, немис форту, шаарды курчаган тоодо немис неоготика стилинде салынган 3 сепил ж. б. сакталган. Өлкөдөгү эң чоң китепканасы, Намибия университети (1992), Политехникалык институт, Улут­тук музей (1958), Улуттук искусство галереясы, Зооло­гия багы бар. Жыл сайын пиво фестивалы (ок­тябрда Мюнхенде болуучу «Октоберфеста» фестивалынын аналогу) өткөрүлөт.

Шаардын көрүнүшү.

Каракөл көрпө­сүн соодалоочу дүйнөдөгү эң ири борбор. Тамак ­аш (анын ичинде пиво кайнатуу, эт консервасы), тигүү, самын кайнатуучу, жыгаччылык, эмерек, ма­шина куруу өнөр жай ишканалары иштейт.