ВИННИЦА
ВИ́ННИЦА – Украинанын түштүк-батыш бөлүгүндөгү шаар, Винница облусунун административдик борбору. Калкы 351 миң (2006). Днепр бою дөңсөөсүндө, Түштүк Буг дарыясынын боюнда жайгашкан. Жолдор тоому. Эл аралык аэропорту бар. Алгач 1362- жылдан Литва чеби катары эскерилет. 1569-жылы Люблин униясы боюнча Польшанын, 1793-жылы Россиянын курамында болгон. Киев – Балтика темир жолунун курулушунан кийин Виница ири соода борборуна айланган. Улуу Ата Мекендик согуш мезгилинде катуу талкаланган. Жыгач чиркөөлөр, иезуиттер (XVII кылым), доминикчилер (XVIII кылым) жана капуциндер (XVIII кылым) монастырлары сакталган. Ю. А. Гагарин атындагы аянт ансамбли, Н. И. Пироговдун бальзамдалган сөөгү коюлган чиркөө-мавзолей, 9 илим-изилдөө институту, университеттер, китепканалар, музейлер, музыкалуу-драма, куурчак, камералык театрлар бар. Машина куруу (трактор, комбайндарга тетиктер), химия (лак-сыр материалдары, синтездик кир жуучу каражаттар жана башкалар), жеңил, тамак-аш өнөр жай ишканалары иштейт.