ВИЧЕНЦА
ВИЧЕ́НЦА – Италиянын түндүк-чыгышындагы шаар. Венеция облусунун жана Виченца провинциясынын административдик борбору. Калкы 117,3 миң (2006). Альп тоосунун этегинде жайгашкан. Жолдор тоому. 1115-жылдан эркин шаар-коммуна.
Рим театрынын калдыгы, криптопортика, көпүрөлөр, акведук, чиркөөлөр, соборлор, сарайлар, палаццо, базилика жана башкалар сакталган. Виченца Италиянын зер буюмдар өндүрүшүнүн ири борбору. Баалуу буюмдардын (алтындан жана күмүштөн жасалган) эл аралык көргөзмөлөрү өткөрүлүп турат. Зергерчиликке керектүү жабдууларды чыгаруучу өндүрүшү, машина куруу (текстиль, аайыл чарба, электр-техникалык жана башкалар), текстиль, тигүү, булгаары бут кийим, жыгаччылык, эмерек, химия, тамак-аш, курулуш материалдары, карапа буюмдар өнөр жайы иштейт. Виченца жана Венеция облусундагы Палладио курган виллалар Бүткүл дүйнөлүк мурастын тизмесине киргизилген.