ГАГАРИН Юрий Алексеевич

ГАГА́РИН Юрий Алексеевич [9.3.1934, Смоленский облусу, Гжатск (азыркы Гагарин) району, Клушино (азыркы Гагарин) айылы – 27.3.1968, Москва]-учкуч-космонавт, полковник, Советтер Союзунун Баатыры (1961). Коомдук-саясий ишмер. Курулуш техникумун (1951), аэроклуб курсун, Саратов шаарындагы Чкалов атындагы 1-авиациялык окуу жайын (1955–57),

Жуковский атындагы аскер-аба академиясын 1968-жылы февралда бүтүргөн. 1961-жылы 12-апрелде адамзат тарыхында биринчи жолу «Восток» космос кемеси м-н космоско учуп, Жер шарын 1 с 48 минда айланып, жерге конгон. Учкуч-космонавттарды даярдоого активдүү катышкан, космос кемелеринин учушуна жетекчилик кылган, көптөгөн коомдук-саясий иштерди аткарган. Гагарин авиациялык машыгууда кырсыктан курман болгон. Ысымын түбөлүк калтыруу үчүн айрым шаарлар, райондор анын аты м-н аталган. Айдын аркы бетиндеги кратерге ысмы берилген. Эл аралык авиациялык федерациянын Гагарин атындагы сыйлыгы белгиленген (1968). Ага Чехословакиянын Социалисттик Эмгек Баатыры, Болгариянын Баатыры деген наамдар берилген. Сөөгүнүн күлү Кызыл аянттагы Кремль дубалына коюлган. Кыргызстанда бир нече ирет болгон.

Эмг.: Вижу Землю. 3-е изд. М., 1976; Дорога в космос. М., 1981.
Ад.: Степанов В. И. Юрий Гагарин. М., 1987; Орозбеков К. Эл баалаган эмгек. Б., 2006.