ГАЛЛЕЙ КОМЕТАСЫ

ГАЛЛЕ́Й КОМЕТАСЫ – жарык комета. Англиялык астроном Э. Галлейдин ысмынан аталган. Ал 1-жолу (1705) асман мейкиндигиндеги кометалар кыймылы ж-а алардын орбиталары параболага жакын экендигин байкаган. Эллипс орбитасы боюнча айланарын, Күнгө мезгили м-н (ар 75–76 жылда) кайрылып турарын айткан. Ал 24 жарык кометанын орбитасын, анын ичинде 1531-, 1607- ж-а 1682-жылдары көрүнгөн кометалардын орбиталарынын траекториясы окшош ж-а алар бир эле комета экендигин аныктаган. Ал 1758-жылы кайра келерин айткан. Б. з. ч. 446-жылдан 1909-жылга чейин 29 жолу көрүнгөн. 1910-жылы перигелий аркылуу өткөн. Акыркы жолу 1986-жылы Күнгө эӊ жакын аралыкта өткөнү телескоп аркылуу байкалган.