ГАЛОГЕНЕЗ

ГАЛОГЕНЕ́З (гр. hfls – туз ж-а ...генез) – кургакчыл зоналардагы туздуу суу бассейндеринде буулануунун натыйжасында оӊой эрий турган туздардын пайда болуу процесси. Туздуу суунун топтолушу узак убакыт бою, ал эми туздун чөгүшү кыска мөөнөттө жүрөт. Галогенез курамындагы минералдар м-н микроэлементтерге карай химиялык үч негизги типке бөлүнөт: карбонаттуу (содалуу), сульфаттуу ж-а хлориддүү. Суу бассейндеринин пайда болушуна жараша континенттик ж-а деӊиздик галогенез деп аталат. Галогенездин жүрүшү үчүн ариддик климат, бассейнге суунун (айрыкча деӊиздик) кошулуп турушу, бирок андан агып чыкпашы, туз чөгүп жаткан аймактын ийилип турушу зарыл. Галогенезден туз катмарларынан башка дагы жер астында өтө туздуу суунун запасы пайда болот.