ГАЛУЯН НЕФРИТ КЕНИ

ГАЛУЯН НЕФРИ́Т КЕНИ Баткен облусунун Кадамжай районунда, Айдаркен шаарынан 15 км түштүктө, Алай кырка тоосундагы Галуян коктусунун баш жагында жайгашкан. 1982-жылы табылган. Кен аймагында негизинен девон мезгилинде пайда болгон чөкмө тоо тектер жатат. Аларды Алай кырка тоосунун кырында гранит интрузиялары жиреп чыккан. Кен ири кесекчелүү мөӊгү чөгүндүсүнүн (моренанын) арасында нефрит сымал тоо тектин чоӊ төө таштары түрүндө. Мында нефрит сымал тоо тек акиташтегинин гранит интрузиясынын чегинде скарндашуусунан пайда болгон. Нефрит күӊүрт жашыл түстө, чачышкан тарам түзүлүштө. Андан кооз ж-а асем буюмдарды жасоого болот.