ГЕОГРАФИЯЛЫК СОЮЗ

ГЕОГРАФИЯЛЫК СОЮ́З э л а р а л ы к – дүйнө географтарынын эл аралык уюму. 1922-жылы негизделген. Эл аралык Географиялык союзга 90дон ашуун мамлекет мүчө. Географиялык союздун максаты: географиянын проблемаларын изилдөөгө көмөктөшүү (айрыкча эл аралык көмөктөшүүнү талап кылган суроолорду чечүү б-ча); алардын илимий талкуулоосун камсыз кылуу ж-а жыйынтыгын басып чыгаруу; эл аралык ж-а региондук конференцияларды өткөзүү; конгресс арасында эл аралык Географиялык союздун милдетин аткаруучу комиссиянын курамын бекитүү ж. б. Географиялык союздун башкаруу органдары мүчө өлкөлөрдүн улуттук делегацияларынын башчыларынан шайланган Генералдык ассамблеядан (4 жылда бир жолу конгресс учурунда чогулат), аткаруу комитетинен (президент, вице-президент ж-а генералдык катчы) турат. Генералдык ассамблея дайындаган аткаруу комитетине Эл аралык Географиялык союздун иш-чаралары жөнүндө маалымат жөнөтүлөт. Эл аралык Географиялык союзга Эл аралык картография ж-а Эл аралык төртүнчүлүк доорду изилдөө ассоциациялары кошулган. Эл аралык Географиялык союздун демилгеси м-н «Бюллетень» (жылына 2 номур) жарык көрүп турат. Анда конгресстер м-н конференциялар жөнүндө маалымат, комиссиянын иши жөнүндө көрсөтмөлөр, Эл аралык картография ассоциясынын маалыматтары көрсөтүлөт. Эл аралык Географиялык союз комиссиялары географиянын жаӊы актуалдуу багыттарынын өнүгүшүнө көмөктөшөт (өнөр жай ж-а улуттук отурукташуу системалары, айыл чарбанын өнүгүүсү ж. б.), жаӊы ыкмаларды пропагандалап (системалык анализ ж-а математикалык моделдештирүү, географиялык маалыматтарды топтоо ж-а колдонуу), Эл аралык мүнөздөгү ыкмаларды камтыган көрсөтмөлөрдү иштеп чыгат (геоморфологиялык съёмка ж-а картага түшүрүү), ошондой эле географиялык терминологияны унификациялайт.
Н. Алымкулова.