ГЕОЭКОЛОГИЯЛЫК КАРТА ТҮЗҮҮ
ГЕОЭКОЛОГИЯЛЫК КА́РТА ТҮЗҮҮ – аймактын геоэкологиялык шартын изилдеп ж-а анын картографиялык моделин түзүү боюнча талаа, лабораториялык ж-а камералык иштердин жыйындысы. Геоэкологиялык шартка адамзаттын ден соолугуна таасир тийгизүүчү табигый чөйрөнүн мүнөзү ж-а касиеттери, чарбалык системанын иштөөсү, биоценоздордун абалы ж-а алардын техногендик таасирге туруктуулугу кирет. Геоэкологиялык карта түзүү табигый чөйрөнү коргоо ж-а аны сарамжалдуу пайдалануу боюнча иш-чараларды негиздейт. Геоэкологиялык карта түзүү үчүн төмөнкү маселелерди чечүү зарыл: 1) табигый чөйрөнүн касиеттерин изилдөө, алардын мейкиндик боюнча өзгөрүү закон ченемин аныктоо, жалпы мүнөздөмөсүн алуу, табигый абалын типтештирүү; 2) геосистемалардын табигый ж-а техногендик таасирлерге реакциясын, алардын таасиринен геологиялык, геофизикалык, геохимиялык процесстердин өнүгүү закон ченемдүүлүгүн изилдөө, экологиялык ж-а инженердик тобокелдикке баа берүү; 3) техногендик таасирдин булактарын аныктоо ж-а аларга экологиялык мүнөздөмө берүү м-н табигат чөйрөсүнүн өзгөрүү мүнөзүн ж-а масштабын аныктоо; 4) учурдагы табигый чөйрөнүн абалына баа берүү, техногендик таасирден анын өзгөрүү деӊгээлин, экологиялык кырдаалды ж-а экологиялык абалдын өнүгүү тенденциясын аныктоо.
Р. Осмонбекова.