ГИДРОАКУСТИКА

ГИДРОАКУ́СТИКА ( гидро… ж-а акустика) – акустиканын суу астындагы локация, байланыш максатында суу чөйрөсүндөгү (деӊиз, океан ж. б.) үн толкундарынын таралышын үйрөтүүчү бөлүмү. Суу астында үн начар басаӊдагандыктан, абага караганда өтө көп аралыкка тарайт. Мисалы, 500–2000 Гц жыштык диапазонунда үн суу ичинде 15–20 кмге, ультраүндөр 3–5 кмге таралат. Үндүн таралышына суунун илээшкектигинен тышкары анын рефракциясы (сынышы) ж-а чачырашы тоскоол болот. Бийиктик боюнча гидроакустикалык басымдын өзгөрүшү, Күн таасиринен суу массасынын жылышын ж-а туздуулугунун ар кандайлыгы тереӊдик боюнча суунун касиеттеринин бирдей эместигине алып келип, булар үн рефракциясын пайда кылат. Ушуга байланыштуу үндүн таралуу ылдамдыгы тереӊдикке, суу басымына, температурага, жыл ж-а күн мезгилдерине ж. б. себептерге карата өзгөрөт. Гидроакустика суу астындагы ж-а суу үстүндөгү объектилерди табуу ж-а классификациялоо, суу астындагы үн байланышы, навигация, суу тереӊдигинде изилдөө ж. б-да колдонулат. Негизги гидроакустикалык каражаттарга гидролокатор, эхолот, гидрофон ж. б. кирет.

Ад.: Бреховских Л. М. Волны в слоистых средах. М., 1957; Подводная акустика//Пер. с англ. Т. 1 – 2. М., 1965–70.