ГОНЧАР

ГОНЧА́Р Олесь (Александр Терентьевич) (3. 4. 1918, Полтава, Суха кыш. – 1995, Киев) – жазуучу, публицист, коомдук ишмер, СССР мамлекеттик сыйлыгынын лауреаты (1948, 1949). УССР ИАнын академиги (1978), Социалисттик Эмгектин Баатыры (1978). Днепропетровск университетин (1946) бүтүргөн. Алгачкы аӊгемелери («Чиелер гүлдөйт», «Иван Мостовой» ж. б.) 1938-жылы жарык көргөн. «Туу көтөрүүчүлөр» үчилтиги («Альп тоолору», 1946; «Көгүлтүр Дунай», 1947; «Алтын Прага», (1948). Ал – «Таврия» (1952), «Перекоп» (1957), «Собор» (1968), «Катуу бороон» (1970) романдарынын автору. «Адам жана курал» (1960) романы үчүн Т. Шевченко атындагы сыйлыктын (1962), «Жылаажын» (1963) романы үчүн Лениндик сыйлыктын (1964) лауреаты болгон. Гончардын чыгармалары чет тилдерге, анын ичинде кыргыз тилине которулган. Гончар СССР Жогорку Советине (6–8-шайланышынын) депутат, Украина жазуучулар союзунун башкармасынын төрагасы (1959–71) болгон. Эки Ленин, башка ордендер ж-а медалдар м-н сыйланган.

Чыг.: Жылаажын. Ф., 1968; Избранное. М., 1969.
Ад.: Клименик О. Олесь Гончар. К., 1966.