ГРИГОРОВИЧ
ГРИГОРО́ВИЧ Юрий Николаевич (2. 1. 1927-жылы туулган, Ленинград) – балет артисти, балетмейстер-хореограф, педагог, публицист, СССР эл артисти (1973), Өзбек ССРинин эл артисти (1981), Казакстандын эмгек сиңирген ишмери (1995), Башкырстан Республикасынын эл артисти (1996), Социалисттик Эмгектин Баатыры (1986), СССР мамлекеттик сыйлыгынын лауреаты (1977, 1985). Ленинград хореографиялык окуу жайын бүтүргөн (1946). 1964-жылга чейин Ленинград опера жана балет театрынын солисти, 1962–1964-жылдары ушул театрдын балетмейстери, 1964–1995-жылдары Чоӊ театрдын башкы балетмейстери. Ленинград опера жана балет театрында коюлган С. Прокофьевдин «Таш гүл» (1957), А. Меликовдун «Сүйүү тууралуу баян» (1961), П. Чайковскийдин «Щелкунчик» (1966, Чоӊ театр; 1973, Вена)
спектаклдери балетмейстерлик чыгармачылыгынын өсүшүнө түрткү берген. 1970-жылы П. Чайковскийдин «Ак куу көлү», 1973-жылы «Уйкудагы сулуу» балеттеринин жаӊы редакциясын койгон. А. Хачатуряндын «Спартак» балетинде элдик-баатырдык теманы классикалык бийдин каражаттары аркылуу ачып берген (1968; Лениндик сыйлыктын, 1970). С. Прокофьевдин «Иван Грозный» (1975), «Ромо-Джулетта» (1979), А. Эшпайдын «Ангара» (1976; СССР мамлекеттик сыйлыгы, 1977), Д. Шостаковичтин «Алтын кылым» (1982), А. Глазуновдун «Раймонда» (1984), А. Адан – Ч. Пунинин «Корсар» (1994) жана башка балеттерди койгон. 1973-жылдан Ленинград консерваториясында педагог. Ата Мекенге сиңирген эмгеги үчүн I, II, III даражадагы ордени (2002, 2007, 2011), Ленин ордени (1976, 1986) жана бир нече медалдар менен сыйланган.
