ГҮЛДЕРЕК МРАМОР КЕНИ

ГҮЛДЕРЕК МРА́МОР КЕНИ Талас облусунун Бакай-Ата районунда, Миӊ-Булак кыштагынан 4 км түндүк тарапта, деӊиз деӊгээлинен 1920–2143 м бийиктикте жайгашкан. 1985–88-жылдарда чалгындалган. Мрамор рифейдин аягында пайда болгон, орто кристаллдуу, декорациялуу, түстүү, тилкелүү ак, кара, боз (бозомук) жашыл тилкелерден турат. Орточо тыгыздыгы 2,74 г/см³, көзөнөктүүлүгү 1,46%, суу сиӊирүүсү 0,11%, кургак абалда басканда бектигинин чеги 94,96 МПа, сууга каныккан абалда – 86,08 МПа. I–IV топтош кондициялык блоктордун чыгышы – 23,56%, сайкалданган такталардын чыгышы – 13,9 м²/м³. Запасы: А+В–872 миӊ м³, А+В+С₁ – 1269 миӊ м³.