ДАМДИНСУРЭН
ДАМДИНСУРЭН Цэндийн (14. 9. 1908, азыркы Чыгыш аймагы – 27.5.1986, Улан-Батор) – моӊгол жазуучусу ж-а илимпоз. Азыркы моӊгол адабиятын баштоочулардын бири. Чыгармалары 1926-жылдан жарыялана баштаган. «Түрткүнчүк кыз» (1929) повести – жаӊы моӊгол прозасындагы туӊгуч ири чыгарма. «Ак чач энем» поэмасынын (1934), «Таӊ каларлык үйлөнүү тою» (1966), «Алтын казык», «Экөө теӊ менин уулум», «Тилек жөнүндө жомок» ж. б. аӊгеме жыйнактарынын автору. Ошондой эле анын "Гэсэриаданын тарыхый тамырлары» (1957), «Моӊгол көркөм адабиятынын обзору», «“Рамаяна” Моӊголияда» (1976) ж. б. илимий эмгектери бар. Адабият м-н илимдеги ишмердиги үчүн Моӊголиянын мамлекеттик сыйлыгы берилген (1946, 1948, 1951).
Ад.: Михайлов Г. И. Очерк истории современной монгольской литературы. М., 1955.