ДАНАКЕРЛӨӨ

ДАНАКЕРЛӨӨ – атайын данакерди көлкүлдөтө эритип, аны металл тетиктердин кошула тур­ган жерине куюп, бири-бирине бириктирүү. Данакерлөө негизинен металл тетиктери бири бири менен, ал эми айрым учурда карапа, айнек жана башка ме­талл менен бириктирилет. Данакерлөө кол менен, ошондой эле ме­ханикалаштырылган же автоматташтырылган атайын курулмада жүргүзүлөт. Данакердин эрүү температурасына карата катуу жана жумшак Данакерлөө бо­луп айырмаланат. Айрым учурда электр, газ го­релкасы же жогорку жыштыктагы токтун жар­дамы менен ысытуу аркылуу индукциялык, тий­мектүү жана жаалуу Данакерлөө пайдаланылат. Металл­дарды бекем бириктирүү үчүн алардын данакер­ленүүчү жери жакшы тазаланып, даты, майдын тактары кетирилиши зарыл. Данакерлөө радиоаппара­тура, прибор куруу, металл идиштерди жасоо жана башка өнөр жай тармактарында кеӊири колдонулат. Кыргыз зергерлери менен усталары ат жабдыкта­рын, кыз-келиндердин асем буюмдарын, кемер­-курларды, мергенчилик, жоокердик курал-жа­рактарды, сандык, чыгдан, ала бакан сыяктуу үй эмеректерин жасоодо жана кооздоодо Данакерлөөнү кеӊири колдонушкан.