ДАРЕНДОРФ

ДА́РЕНДОРФ (Dahrendorf) Ральф (1.5. 1929-ж. туулган, Гамбург) – социалдык стратификация ж-а жаӊжалдар теориясын негиздеген немис саясат иликтөөчүсү, азыркы либерализмдин идеологу. Дарендорф «Индустриялык коомдогу тап жана тап жаӊжалдары» (1959), «Жаӊжал жана эркиндик» (1972) аттуу эмгектеринде социалдык стратифика­ция концепциясын ж-а «Жаӊжал теориясын» иштеп чыккан. Дарендорф таптар ортосундагы жаӊжал­дын түпкү себебин менчиктен эмес, коомдогу үстөмдүккө карата көз карандылыктын каршы­лык көрсөтүүсү м-н байланыштырган. Мындай кырдаал кайсы гана коом болбосун баарына та­андык болгондуктан, тийиштүү жаӊжалдарды жаратпай койбойт, – деген. Дарендорфтун пикири б-ча «кимде ким жаӊжалдардын кесепетин эске алып, аларды колго алууга алы келсе, ал тарых ыр­гактарын көзөмөлдөөнү да колуна алган болот». Анын көз карашы боюнча социалдык жаӊжал­дар – кайсы коомдо болбосун баш ийүүчүлүк м-н үстөмдүктүн ортосундагы мамилелердин на­тыйжасы. Жаӊжалды күчтөп басуу, аны күчө­түп-курчутуп жиберет, ал эми «рационалдуу жөндөө» – көзөмөлдөнүүчү эволюцияга алып келет,– деп эсептейт.