ДАСТОРКОН

ДАСТОРКОН (фарсча дастар – жоолук), т а с­м а л – 1) үстүнө тамак-аш коюлчу кастарлуу буюм. Дасторконду жайганда туюк учу төрдү караты­лып, алгач нан коюлат. Дасторкон байыртадан таза, ыйык буюм катары саналып, үстүнөн эч ким аттабаган. Учурда Дасторкондун кездеме, клеёнка жана башка материалдардан жасалган көп түрлөрү бар. 2) Берилүүчү тамак-аштын жалпы аталышы. Дасторкондон даам татуу улуулата нан ооз тийүүдөн башталат, чай куюлган чыны солдон оӊду ка­рай сунулат. Дасторкон жайып, тамак ичип олтурганда үйгө келген конокту пейили, ниети таза адам катары урматтап тосуп алышып, сый көрсөтүшөт.

Салт боюнча конок үй ээлерине: «Дасторконуӊ кеӊ болсун, үстүндө тамак-ашыӊ мол болсун, үйүӊөн кут, береке кетпесин», – деп бата берген.