ДИАЛЕКТИКА

ДИАЛЕ́КТИКА (гр. dialektike – аӊгеме жүргүзөм, ой калчайм, сөзмө-сөз — аӊгемелешүү, маек куруу чеберчилиги) – дүйнөнү таанып-билүүнүн жалпыга таандык методологиясы жана теориясы. Антикалык философияда дүйнөдөгү бардык нер­селер тынымсыз өзгөрүү абалында экенин, мын­дай аккан дүйнөнүн өнүгүүнүн жүрүшүндө өзүнүн карама-каршысына өтүүчү ролун көрүшкөн. «Диалектика» терминин алгачкы жолу элейлик философ Зе­нон колдонгон. Аристотелдин өзүнүн ырастоо­сунда диалектика – бул талаш-тартыштын каражаты менен же карама-каршы пикирлерди талкууга алуу жолу менен акыйкатка жетүү өнөрү. Гегелдин диалектикасында ар бир нерсе өзүнө-өзү теӊ, жана ошол эле убакта ал өзү-өзүнө барабар эмес, ал бир түрдүү, бүтүн да, ошол эле учурда көп тарамдуу, татаал түзүлүш да, бир жагынан өлбөс-өчпөс, түбөлүктүү болсо, ошону менен бирге өтүп кетүүчү, убактылуу, утурумдук көрүнүш. Ошондон улам диалектика дүйнөнү таанып-билүүнүн баарына таандык философиянын жалпы методологиясы болуп эсептелет. Философиянын тарыхында «диалектика» термининин айланасында ар түрдүү чечмелөөлөр, түшүндүр­мөлөр болуп келген: бир даары аны «диалог өнөрү» десе, да бирлери карама-каршы пикир­лерди күрөштүрүү жолу менен акыйкатка жетүү (Сократ), же нерселердин маӊыздарынын сезим чегинен тышкаркы (идеалдуу) жагына жетүү максатында түшүнүктөрдү бөлүк-бөлүктөргө бөлүү ыгы жана байланыштыруу жолу (Платон), нерсени толук бойдон, абсолюттуу билүүгө ки­ришүүнүн жүрүшүндө сөзсүз болуучу каршылык­тардын натыйжасында улам келип чыккан адам акыл-эсинин бурмаланган түшүнүгүн бузуп-кый­ратуу ыкмасы (И. Кант. «Трансценталдык диалектика») деп эсептешкен. Ал эми Г. В. Ф. Гегель филосо­фиянын тарыхында баарын кеӊири камтыган диалектиканын жалпы, универсалдуу системасын бирин­чи жолу жараткан.

Т. Абдылдабеков.