ДИАЛЕКТОЛОГИЯЛЫК СӨЗДҮК
ДИАЛЕКТОЛОГИЯЛЫК СӨЗДҮК – диалектидеги сөздөрдүн түшүндүрмө сөздүгү. Кыргызстанда мындай сөздүк алгач Ж. Мукамбаев тарабынан түзүлгөн. Көп жылдык диалектологиялык изилдөөлөрдүн негизинде 1972-жылы «Кыргыз тилинин диалектологиялык сөздүгүнүн» 1-тому басылып чыккан, ал кайра оӊдолуп, толукталып 2-жолу 1976-жылы басылган. Бул эмгек 4 томдон турат (калган томдору китеп болуп чыга элек). Диалектологиялык сөздүктө диалектилик бай материал жыйналып, ар бир сөзгө маанисине карата толук түшүндүрмө берилген. Сөздүктө кыргыз тилинин лексикасы диалектилик сөздөрдүн эсебинен толукталып жаткандыктан, андагы айрым диалектилерди, өзгөчө жергиликтүү элдин турмуштук, чарбачылык, маданий, этнографиялык маанидеги сөздөрүн адабий тилде да кеӊири колдонуу м-н, анын лексикалык курамын андан ары байытууда, ошондой эле этимологиялык ж-а лингвистикалык изилдөөлөрдү жүргүзүүдө баалуу эмгек болуп саналат.
К. Акынбаев.