ДИНИЙ ИШЕНИМ
ДИНИЙ ИШЕНИМ – Кудайга, анын чексиз улуу кудуретине көзү жетүү м-н ак дилден ынануу, ар кандай диний окуулардын укмуштуу күчүн эч далилсиз моюндоо, ырым-жырымдардагы, жөрөлгө-салттардагы табынуулардын, сыйынуулардын сыйкырына терең берилүү м-н кабылдоо сыяктуу рухий таасирлердин натыйжалар түрүндөгү зор тобу. Д. и. көп кырдуу. Ал табияттан тышкаркы керемет күчтөрдүн, кубулуштардын бар экенине, алардын жаратмандык же кыйраткыч кубаттарынын реалдуу экенине, адамдарды ар кандай кырсыктардан коргоп, сактап калгыч теңдешсиз зарделеринин (энергияларынын) толук бар экенине эч бир далилтажрыйбага таянбай туруп эле көзү жеткендей кабылдоосу сыяктуу көптөгөн көрүнүштөрдү кучагына алат. Албетте, Д. и. адамдардын рухий турмушунда дем берүүчүлүк, шыктандыруучулук ролду ойноп келген, ошону м-н бирге ар адамдын ички жан дүйнөсүндө, күндөлүк жашоосунда, жүрүм-турумдарын максатташтырууда олуттуу рухий жөлөк болуп берген. Ушул мааниде алганда Д. и. – ар кандай диний идеологиянын эң таасирдүү куралы.