ДИНЛИН

ДИНЛИН , т и н г л и н г – финн-угорлорго караштуу байыркы уруу. Б. з. ч. 4–3-к-да Д-дер Саян-Алтай, Минуса ойдуңу ж-а Гоби чөлүнүн түндүгүн мекендешип, күч-кубатка ээ болгон мезгилинде Түн. Кытайды басып алышып, Чжоу бийлигин курушкан деген маалыматтар бар. Б. з. ч. 201-ж. хунндардын чабуулуна байла­ныштуу батышка ооп, 49-ж. аларга багыныш­кан. Кээ бир белгилүү окумуштуулардын (мис., А. Н. Аристов, С. М. Абрамзон, С. П. Толстов ж. б.) пикиринде Д-дер кыргыз элинин калып­танышына таасир тийгизген уруулардын бири болгон. В. В. Бартольд б-ча Д-дер енисейлик ос­тяктардын (кеттер) байыркы ата-бабалары бо­лушу мүмкүн. Д. тууралуу акыркы кабар моң­голдордун Саян-Алтайды басып алышы (12-к.) м-н аяктайт. Т. Жуманалиев.