ДИПЛОМАТИЯЛЫК ӨКҮЛЧҮЛҮК

ДИПЛОМАТИЯЛЫК ӨКҮЛЧҮЛҮК – мамлекет­тин чет өлкөлөр м-н катнашуу мекемеси. Ту­руктуу расмий байланыш жүргүзүү үчүн мамле­кеттердин өз ара макулдашуусунун чегинде Д. ө. түзүлөт ж-а ал өкүлчүлүк мамлекеттердин орто­сунда дипл. мамилелер түзүлгөндөн кийин жи­берилет. Д. ө. экон., маданий байланыш, сая­сий маселелер, басма сөз, аскердик атташе, кон­сулдук иштер сыяктуу бөлүмдөрдөн турат. Анын курамы: а) дипл. (элчи, атташе, катчылар ж-а кеңешчилер); б) админ., в) тех. кызматкерлер болуп бөлүнөт. Д. ө-түн башкы милдети: өз өлкөсүнүн ж-а анын жарандарынын кызыкчы­лыгын эл аралык укуктун чегинде коргоо; өзү иштеп турган өлкөнүн өкмөтү м-н сүйлөшүүлөр­дү жүргүзүү; ал өлкөнүн саясий турмушу ж-а ан­да болуп жаткан окуялар тууралуу мыйзамдуу жол м-н өз өкмөтүн кабардар кылып туруу; өз өлкөсүнүн тышкы соодасынын жөнгө салыны­шы б-ча кам көрүү ж-а анын кызыкчылыгын коргоо. Д. ө-түн негизги иш-вазийпасына кон­сулдук ишти да кошууга болот. Д. ө-тү аны ак­кредиттеген өлкө кайра чакыртып алганда, өлкөлөр ортосунда дипл. байланыш үзүлсө, же алардын ортосунда согуш башталганда ал өз ишин токтотот. Мындай учурларда Д. ө. жай­гашкан имарат, архивдик ж. б. материалдар сак­талууга ж-а корголууга тийиш. Аккредиттеген мамлекет өзүнүн Д. ө-үн, анын мүлкүн, дипл. архивин кайсы бир үчүнчү мамлекеттин өкүлчү­лүгүнө ишенип берет.