ДИСНЕЙ
ДИСНЕ́Й , Дисни Уолт (5. 12. 1901, Чикаго – 15. 12. 1966, Бербанк) – америкалык кинорежиссёр, продюсер. Чикагодогу көркөм искусство академиясынан окуган. 1919–1922-жылдары сүрөтчүлүк кесипти аркалаган, кийин кино тармагына өткөн. 1922-жылы Голливудга келген. 1933-жылы англис жомогунун негизинде тартылган «Үч торопой» мультфильми үчүн Оскар сыйлыгын алган. Анын «Микки Маус», «Маугли», «Бэмби» мультфильмдери белгилүү. «Апакай менен жети эргежээл», «Пиноккио» (1939), «Бэмби» (1942), «Алиса шумдуктардын өлкөсүндө» (1951), «Уйкудагы сулуу» (1958) жана башкалар. 1950–1960-жылдардын аяк ченинде Дисней студиясы табият көрүнүштөрүн көрсөтө турган документалдык фильмдердин сериясын тартууга өткөн: «Адамдар жана мамлекеттер», «Турмуштагы укмуштуу окуя» (айбанаттардын жашоосуна байкоо жүргүзүү). Телекөрсөтүү үчүн атайын программаларды, көптөгөн фильмдерди чыгарган. 1955-жылы Анахайм (Калифорния) шаарында «Диснейленд» паркы ачылган. Анда техникалык аттракциондун жардамы менен Дисней фильмдеринин образдары көрсөтүлөт. Дисней «Робин Гуд», «Казына катылган арал», «Суу астында сексен миң мил» деген көркөм фильмдерди тарткан. Фильмдери үчүн 29 жолу «Оскар» сыйлыгын жеңип алган.
Ад.: Арнольди Э. М. Жизнь и сказки У. Диснея. Л., 1968.