ДИФТОНГ
ДИФТО́НГ (гр. diphthongos – кош үндүүлүк) – эки үндүү тыбыштын бир муунда катар келиши. Кыргыз жерг. говорлорунда Д. аталган тыбыштар ow, уw, өw, үw деген тизмектен турат. W тыбышы созулма м-н айтылган сөздөрдөгү үндүү тыбышка туура келет (мис., тоо – тоw, суу – суw, дөө – дөw, күү – күw ж. б.). Кыргыз адабий тилинде Д. болбогону м-н, айрым говорлорунда кездешет. Түш.-батыш диалектиси м-н Талас, Чаткал говорлорунда эриндүү созулма үндүүлөр сөздүн башында, ортосунда ж-а аягында Д. м-н айтылат. Бул Д-дор жалпы тил илиминин термини м-н алганда анык Д-го дал келип, сөздө бир муунду түзөт (мис., Таластын суwу өтө муздак. Тоwдун башында бир да булут жок). Муун түзүлүшүнө ылайык төмөн түшүүчү ж-а жогору көтөрүлүүчү Д. ажыратылат. Кыргыз тилиндеги Д. жеке тыбыштык бирдик экендиги м-н айырмаланат.