ДОПИНГ
ДО́ПИНГ (англ. doрing, dope – баңгизат берүү) – кабыл алганда организмдин кара күчүн арттырып, көңүлүн көтөрүүчү фармакологиялык ж-а табигый заттар. Мындай абал тез болуп, кыска убакытка гана созулат. Негизинен спорттук ийгиликтерди жакшыртуу үчүн спортто ж-а ветеринарияда колдонулат. Допинг байыркы заманда эле белгилүү болгон, ал эми 20-кылымдан айрым өлкөлөрдө кесиптик спортто колдонулат. Допинг кабыл алган спортчунун организми өтө тез ж-а аз убакыт-
тын ичинде адам чегине жеткен чымыркануу м-н иштейт. Бирок, бул адам ден соолугуна зыян келтирип, кээде өлүмгө да алып келиши мүмкүн. Ошондуктан Эл аралык олимпия комитети 1967-жылы допингди кабыл алууга тыюу салып, эл аралык мелдештерде допингге каршы көзөмөл уюштуруу жөнүндө чечим кабыл алган. Эл аралык мелдештерде допингге каршы көзөмөлдөө комиссиясы иштеп, спортчулар текшерүүдөн баш тартышса же допингди колдонгону аныкталса, мелдештен четтетилет, жеңиши же рекорду эсептелбейт. Ал эми командалык спортто бир эле спортчунун допингди колдонгону аныкталса, ошол команда утулган болуп эсептелет же дисквалификацияланат.