ЕРКИМБАЕВА
ЕРКИМБАЕВА Офелия (1. 10. 1937-жылы туулган‚ Фрунзе – 11. 8. 2017-жылы, Бишкек шаары) – театрдын режиссёру‚ драматург‚ Кыргыз Республикасынын маданиятына эмгек сиӊирген ишмер (2003)‚ Кыргыз Республикасынын эл артисти (2008). Ленинграддагы А. Я. Ваганова атындагы хореографиялык окуу жайында окуган
(1947–1953). 1954–1955-жылдары Кыргыз опера жана балет театрында балет артисти. 1957-жылы М. Күрөӊкөев атындагы музыкалык окуу жайын, 1962-жылы Россиядагы театр искусство институтунун (ГИТИCтин) актёрлук факультетин бүтүрүп‚ Кыргыз телекөрсөтүүсүндө режиссёрдун ассистенти‚ 1962–1966-жылдары Нарын музыкалык-драма театрында артист. 1970- жылы Россиядагы театр искусство институтунун (ГИТИCтин) режиссёрдук факультетин бүтүрүп‚ Кыргыз мамлекеттик драма театрында артист‚ режиссёр-коюучу болгон. Театрда Г.Фигейредонун «Эзоп»‚ А. Островскийдин «Күнөөсүз күнөөлүүлөр»‚ Н. Гоголдун «Үйлөнүү»‚ Т. Абдымомуновдун «Малика»‚ К. Эшмамбетовдун «Эгиздер»‚ Лопе де Веганын «Бий мугалими» жана башкаларды‚ Н. К. Крупская атындагы. Орус драма театрында У. Шекспирдин «Азоого чалма»‚ «Король Лир»‚ К. Эшмамбетовдун «Cарынжи» жана башкаларды, М. Жангазиев атындагы Куурчак театрында Г. Х. Андерсендин жомогу боюнча «Булбул» спектаклин‚ ошондой эле Башкыр академиялык драма театрында‚ Тува мамлекеттик музыкалык-драма театрында‚ «Кыргызтелефильмде» бир катар спектаклдерди койгон.
Еркимбаева – «Жазылбаган барактар»‚ «Биздин үй-бүлө»‚ «Таштанды бала»‚ «Эмигранттар»‚ «Тагдыр» жана башка пьесалардын автору. Орус классиктеринин бир катар чыгармаларын которгон. 2002-жылдан А. Малдыбаев атындагы Кыргыз улуттук опера жана балет театрынын режиссёру.