ЖАКШЫЛЫКОВ Алымкул
ЖАКШЫЛЫКОВ Алымкул [1890, Бишкек уезди, Ак-Суу болушу (азыркы Сокулук району, Белек айылы) – 1938, Фрунзе) – Кыргызстанда Совет бийлигин орнотууга ж-а чыңдоого активдүү катышкандардын бири.
Советтик партиялык мектепти(1928–30),Орто Азия коммунисттик университетинин курсун (1933, Ташкент), Москва социалисттик жер иштетүү академияс ын (1935) бүтүргөн. 1916–17-жылдарда Чөмүч суу сактагычында жумушчу болуп эмгектенип, орус революционерлери м-н таанышкан. 1918-жылы большевиктер партиясына өтүп, Сокулук аймагында большевиктик алгачкы партиялык ячейканы уюштурган. 1920-жылдан «Жарды-жалчы» уюмунун, ревкомдун, Сокулук, Аламүдүн райондорунун аткомунун, Сокулук райондук жер-токой бөлүмүнүн, ВКП(б)нин Фрунзе шаардык, Аламүдүн, Нарын райондук жумушчу-дыйкан инспекцияларынын төрагасы, жооптуу секретары, контроль комиссиясынын жооптуу секретары, «Кыргыз токой» трестинин директору болуп иштеген. Кыргыз АССР БАКтын мүчөсү (1936). 1936-жылы жалган жалаа м-н партиядан чыгарылып, 1937-жылы 30-декабрда атууга буйрулган. 1957-жылы акталган. Сокулук аймагында кедейлерге жер бөлүштүрүү, отурукташтыруу, колхоздоштуруу, мектеп куруу иштерин жетектеген. Сокулук районунун борборундагы мектеп-гимназияга ысмы берилип, айкели орнотулган.
З. Бейшеев.