ЖАЛАЛ-АБАД БАТКАК КЕНИ

ЖАЛАЛ-АБАД БАТКАК КЕНИ – Жалал-Абад облусундагы чым көңдүү дары баткагы жаткан жер. Жалал-Абад шаарынан 5 км түштүк-чыгыш та­рапта, Айып-Тоонун батыш капталында, деңиз деңгээлинен 1070–1075 м бийктикте. Кен эки башка саздак участкадан турат. Жалпы аянты 7520 м². Эң үстүндө кумдуу топурак (калыңдыгы 0,2– 0,3 м), астында каралжын күрөң түстөгү эзил­ген чым көң баткагы (калыңдыгы 1,5 м) жа­тат. Дары баткактын 0,25 мм бөлүкчөлөр м-н булганышы 4,7%, өсүмдүк калдыктарынын чи­риши 82%ке жетет. Баткактын суюк ылайы 47– 78% ж-а ал сульфат натрийлүү, өтө карбонат­туу (коэффициенти 0,18–0,89). Кристаллдык скелет 10,864–11,953%. Коллоиддик комплекс 10,717– 14,557. Запасы 20,2 миң т. Кендин ж-а ал жер­ден чыккан минералдуу суунун базасында Жа­лал-Абад курорту иштейт.