ЖАЛАЛ-АБАД КУРОРТУ
ЖАЛАЛ-АБАД КУРОРТУ – климаттык-бальнеологиялуу, минералдуу суу жана баткак менен дарылоочу курорт. Ал Жалал-Абад шаарынан 5 км чыгыш тарапта, Көгарт өрөөнүндө, Айып-Тоонун батыш капталында, деңиз деңгээлинен 975 м бийикте жайгашкан.
Климаты континенттик, кышы жумшак, кары аз, январдын орточо температурасы – 2°С; жаз эрте келет; жайы ысык, кургак, июль айынын орточо температурасы 27°С. Жылдык жаан-чачыны 460 мм, анын көбү жаз жана күз мезгилине туура келет. Курорттун негизги дарылоо факторлору: минералдуу суулар, баткак жана климат. Минералдуу суулары 1877-жылы 1-жолу химиялык изилдөөдөн өткөрүлүп, дарылык касиети аныкталган. Курорт 1939-жылдан жыл бою үзгүлтүксүз иштейт. Ысыктыгы 44°Сге жеткен минералдуу суунун курамында азот газы, хлорид-сульфат-гидрокарбонат натрий-кальций бар (кара, Жалал-Абад минералдуу суусу). Минералдуу суу ванна, душ алуу жана ичүү жолдору менен дарыланууга пайдаланылат. Баткак менен дарылоодо аппликация, тампон жана баткакты электр тогу менен айкалыштырып жүргүзүлөт (кара, Жалал-Абад баткак кени). Курортто муун, борбордук жана четки нерв системасынын ооруларынан, карын, боор, өт баштыкчасынын сезгенүүсүнөн, тери, бөйрөк, гинекологиялык оорулардан жапа чеккендер дарыланат.